KOMENG DAN MARKONAH
Oleh : Wiarsih Asikin
SEMBILAN BELAS
Gimane Komeng mau
nolak anjuran engkong Lihun nyang minta supaya die anterin Markonah pulang.
Emang sih, Komeng bisa nolak. Sebab\, kan suasana di komplek aman, masih ramai
dan rumah Markonah juga kagak jauh. Paling cuman dua ratus meter.
Kalo pun ada nyang ngeganggu, paling
paling bapak bapak di komplek nyang punya mate keranjang. Entu juga kalo dia
lagi sendirian. Pastinye, kagak bakalan berani blak blakan ngeganggu, lantaran kalo
lagi jalan bareng sama bokin masing masing, tetep jaga imej. Kalo nekad, sama
aje sengaja ngerangkai keributan sama bini.
“Lu lagi mikir mau nganter ape lagi
mikir nggak mau nganter, sih? Bepikir tuh jangan lama lama, Meng. Ntar malah
ilang pikiran, kan bukan gue aje nyang repot. Markonah juga bakalan ikut repot,
tuh,” kate Kong Lihun, nyang kepaksa negor buat ngingetin Komeng lantaran
nimbang nimbang anjurannye buat nganterin Markonah dianggap kelamaan
“ Sebenernye sih aye sih bukan cuman
siap, Kong. Tapi juga mau kok nganterin. Tapi, kan kalo nyang mau dienterin
kagak besedia, aye jadi kagak enak,” sahut Komeng nyang tentu eje die bekilah
lantaran ngerasa kagak enak.
“ Nyang gue tau, Markonah siap siap aje
tuh dianterin pulang,” celetuk Nyai Minah nyang lantas nengok ke Markonah
“ Onah, lu nggak nolak, kan, kalo pulang
dianter sama si Komeng?”
Markonah yang mulain ngedenger anjuran
dari Kong Lihun udeh ngumpetin rasa senengnye lantaran kalo Komeng ngenterin
pulang bisa ngelanjutin obrolan, tentu aje kagak mau beterus terang.
“Nyai… gimane Onah mau bilang besedia
dianter pulang kalo kenyataannye nggak ada nyang mau nagnter. Lagian, Onah
enjoi enjoi aje kok. No problem kok kalo
Onah pulang sendiri,” kate Markonah sembari nyuri nyuri tatap ke Komeng
Kali eni, Komeng bukan kagak tau kalo Markonah
lemparin lirikan ke arahnye. Cuman, die sengaja belagak cuwek.
“Yaa.. kalo mpo Onah lebih enjoi pulang
sendiri, kayaknye saya nggak keberatan deh pulang belakangan. Lagian, masih ada
nyang mau diobrolin lagi kok sama kong Lihun,” ujar Komeng
Ngedenger jawaban Komeng, tentu aja
Kong Lihun jadi kaget. Lantaran kaget, Kong Lihun nyang baru aje ngenyot dengan
asyik kreteknye jadi tersedak. Nggak Cuma entu, kong Lihun juga jadi terbatik
batik, eh, terbatuk batuk. Maklum, asep rokok nyang masih di dalem mulutnye
belon sempet dihembusin ke udare. Jadi, Nyai Minah nyang tadinye mau santai
kepaksa buru buru ngambilin air putih buat sang arjunenye nyang die sayang.
Air putih nyang baru aje direguk Kong
Lihun bener bener manjur. Bisa jadi obat penyembuh batuk kong Lihun, nyang
waktu kaget baru aje nyedot kretek.
“Aer putih nyang lu ambil buat gue,
bener bener manjur Min. Waktu lo ambil inisiatif ambilin aer putih buat gue, lo
pasti ikhlas kan ngerjainnye?” Tanye Kong Lihun ke Nyai Minah
Meski senang ngedenger kalimat lakinye, idung
Nyai Minah kagak langsung kembung. Die nyang emang tau persis gaya lakinye
nyang sering banget besikap mesra, kagak mau nunjukin kalo dirinye bangga punya
laki kong Lihun.
“ Abang… abang… kalo nggak ikhlas, mana
mungkin tuh aer putih ciptaan Allah bisa jadi obat nyang mujarab nyembuhin
batuk abang,” timpal Nyai Minah
“ Kalo lo bisa ikhlas nolong gue, kire
kire, si Komeng bisa nggak ye ikhlas nganterin si Markonah pulang ke rumahnye?”
Kate Kong Lihun.
Doski sengaja manfaatin suasane buat
neken Komeng supaye cepet cepet eksiyen nganterin Markonah pulang.
MAU ape nggak yee Komeng nganterin Onah
pulang ke rumahnye?
Bersambung………
Belum ada tanggapan untuk "CERITA SAMBUNG (19)"
Post a Comment