CERITA SAMBUNG (20)

KOMENG DAN MARKONAH
oleh : Wiarsih Asikin


DUA PULUH



       
          KOMENG bukan nggak bingung. Soalnye, die mau banget nganterin cuman kan lagi nimbang nimbang. Yaa..nimbang apelagi kalo bukan nimbang baik buruknye. Nimbang berbagai hal yang nantinye bisa aje jadi sesuatu nyang nggak diarepin. Nggak dikepengenin. Cuman, sindiran kong Lihun membuat Komeng mesti ambil keputusan.
              "Busyeeet.. deh... kok belon jalan juga sih Meng. Si Onah udeh kepengen banget pulang, tuh?" Suara kong Lihun yang kembali "mendesak", sebenernye lembut. Tapi, di kuping Komeng jadi kayak granat nyang siap meledug. 
                 "Iyee. Meng. Kayaknye nggak ada nyang salah deh kalo lo anterin secepetnye," kate Nyai Minah nyang kayaknye ikut ikutan neken atawa ngasih support buat Komeng.
              " Kong... Nyai... Kayaknye Onah bisa deh pulang sendiri. Kan udeh biase begitu" Markonah nyang jadinye kagak enak buru buru ambil sikap
               " Jadi... Mpok Onah nggak besedia dianter?" Kate Komeng nyang sebenernye mau banget nganter cuman penuh pertimbangan    
           "Kayaknye, dianter atawa kagak, no problem, deh. Cuma, kalo emang ada nyang mau nganter, Onah seneng, kok. Masa sih niat baek seseorang nyang mau ngenter mesti ditolak. Cuman, kalo penuh pertimbangan, yaa nggak ape ape kok Onah pulang sendiri "
           Akhirnye, Markonah emang cepet cepet pamit ke tuan dan nyonye rumah.
            Cuman, nggak jalan sendirian.
          Di samping Markonah, ada Komeng nyang nemenin Markonah pulang ke rumahnye. Sayangnye, udeh puluhan langkah jalan, Komeng masih aje mingkem. Kayaknye, beraaaaaaat banget ngajakin Markonah ngobrol. Padahal, Markonah kepengen banget diajak ngobrol.   
           " Ape sih salahnye kalo ngajak ngobrol gue," kate  Markonah dalem ati, sambil terus ngayun langkah 
           Markonah bukan kagak kesel. Sebab, udeh mau nyampe ke rumah Komeng masih mingkem. Masih membisu. Padahal, tuh bibir cowok nyang nganterin Onah pulang kagak lagi dilakban. Tapi, lagi bebas dan kalo aje mau ngomong, sejuta kalimat juga bisa meluncur. Tentu aje tanpa penghalang. Sebab, Onah bukan aje siap nimpalin. Tapi juga siap kok cuma jadi pendengar, kalo emang maunye Komeng nyang diajak ngobrol cuman ngedengerin.
         Tapi, akhirnya Onah bisa narik lepas lega. Pas sampe di depan rumahnye, Markonah mendengar suara Komeng nyang minta agar dirinya diizinkan mampir karena kepengen ngobrol. Cuman, Markonah justeru menolak dengan halus. Selaen udeh malem, juga kuatir sama babenye nyang kagak kasih izin.
          " Yaa.. kalo gitu, laen kali bisa, kan kite ngobrol dari hati ke hati," kate Komeng, nyang kayaknye bisa ngilangin rasa kuciwa lantaran nggak dikasih peluang mampir
         " Onah kira nggak ada nyang nggak bisa," ujar Markonah.
         "Sekarang, Onah masuk duluan, yee. Trima kasih udeh ikhlas nganterin"
         Komeng kagak sempet ngejawab lantaran Markonah sudah langsung melangkah. Buka peger halaman rumah dan seudeh ngerapetin pager Merkonah buru buru masuk ke dalem.
        Komeng juga kagak kuciwa, meski Markonah tidak berhenti sejenak di depan pintu rumah buat ngelambain tangan. Dia maklum, lantaran sebelumnye kagak bilang kepengen mampir. 
            "Bukankah di sepanjang jalan gue kagak bilang mau mampir?" Komeng kayaknye nyeselin sikapnye nyang telat bilang mau mampir supaye bisa ngobrol sama Markonah
           Aaah... kalo aje dari tadi gue ngomong, mungkin hasilnye bakalan laen. Sekarang. kayaknye gue mesti cepet pulang. Cepet istirahat dan ngatur jadwal, supaya bisa punye waktu buat ngobrol dari ati ke ati sama Onah"
          Tentu aje Komeng nyang lantas pulang, sama sekali kagak tau kalo pas masuk ke kamarnye, Markonah ngegubrakin badan ke ranjang. Ngambil dua bantal nyang lantas dipake buat nutupin wajahnye.
Markonah ngegerutu , tepatnye. numpahin kesel sama Komeng. Sebab, sepanjang jalan Komeng malah rajin mingkem. Padahal, Markonah ngasih peluang buat ngobrolin ape aje. Nyatenye, Komeng malah membisu seribu satu bahasa.

  

Bersambung.....       

Postingan terkait:

Belum ada tanggapan untuk "CERITA SAMBUNG (20)"

Post a Comment